जेऊर कुंभारी वार्ताहर
जिल्हा परिषद प्राथमिक शाळा,गिरमेवस्ती येथील दोन विद्यार्थ्यांनी इयत्ता पाचवी शिष्यवृत्ती परीक्षेत जिल्हा गुणवत्ता यादीत स्थान मिळवून उत्तुंग यश संपादन करून शाळेचे आणि गावाचे नाव उज्वल केले आहे. या यशाबद्दल आम्ही विद्यार्थ्यांचे, त्यांच्या पालकांचे आणि त्यांना अथक मार्गदर्शन करणाऱ्या सर्वांचे मनःपूर्वक अभिनंदन करतो!असे शाळा व्यवस्थापन समिती अध्यक्ष महेश गुरसळ यांनी सांगितले.
श्रावणी सुमित चव्हाण (236 गुण), साई संजय वक्ते (234 गुण) यांनी शिष्यवृत्ती परीक्षेत जिल्हा गुणवत्ता यादीत स्थान मिळवत घवघवीत यश मिळवले आहे. ही कामगिरी विद्यार्थ्यांच्या कठोर परिश्रमाचे आणि शिक्षकांच्या समर्पित प्रयत्नांचे द्योतक आहे.
या यशामागे कोपरगाव तालुक्याच्या गटशिक्षण अधिकारी शबाना शेख आणि केंद्रप्रमुख रावसाहेब लांडे यांचे मार्गदर्शन व प्रेरणा असल्याचे शाळेचे मुख्याध्यापिका प्रियंका जोशी यांनी सांगितले. शाळा व्यवस्थापन समिती अध्यक्ष महेश गुरसळ व सदस्य यांनी यशस्वी विद्यार्थ्यांचे अभिनंदन केले. विद्यार्थ्यांना मार्गदर्शन करणारे इयत्ता पाचवीचे वर्गशिक्षक सुदाम साळुंके आणि सहशिक्षक अनुज ढुमणे यांचाही या यशात मोलाचा वाटा आहे.
या प्रेरणादायी यशाबद्दल आम्हा सर्वांना त्यांचा अभिमान आहे. “मेहनतीने घडलेली यशाची ही शिडी इतर विद्यार्थ्यांसाठी प्रेरणादायी ठरणारी आहे,” असे मुख्याध्यापिका प्रियंका जोशी यांनी सांगितले.
