कोपरगाव प्रतिनिधी
जिल्हा परिषद प्राथमिक शाळा, सडे येथील तीन विद्यार्थ्यांनी इयत्ता पाचवी शिष्यवृत्ती परीक्षेत उत्तुंग यश संपादन करून शाळेचे आणि गावाचे नाव उज्वल केले आहे. या यशाबद्दल आम्ही विद्यार्थ्यांचे, त्यांच्या पालकांचे आणि त्यांना अथक मार्गदर्शन करणाऱ्या सर्वांचे मनःपूर्वक अभिनंदन करतो!असे शाळा व्यवस्थापन समिती अध्यक्ष रमेश पुंजा बारहाते यांनी सांगितले.
श्रुतिका वाल्मीक सहाणे (२४८ गुण), प्रणाली अण्णासाहेब कोताडे (२४६ गुण), आणि आयुष दत्तात्रय पवार (२३४ गुण) यांनी शिष्यवृत्ती परीक्षेत जिल्हा गुणवत्ता यादीत स्थान मिळवत घवघवीत यश मिळवले आहे. ही कामगिरी विद्यार्थ्यांच्या कठोर परिश्रमाचे आणि शिक्षकांच्या समर्पित प्रयत्नांचे द्योतक आहे.
या यशामागे कोपरगाव तालुक्याच्या गटशिक्षण अधिकारी शबाना शेख आणि केंद्रप्रमुख विलास भांड यांचे मार्गदर्शन व प्रेरणा असल्याचे शाळेचे मुख्याध्यापक श्याम डोळस यांनी सांगितले.
सडे गावचे विद्यमान सरपंच आशाताई सूर्यभान बारहाते, उपसरपंच अनिता संतोष बारहाते, शाळा व्यवस्थापन समिती अध्यक्ष रमेश पुंजा बारहाते व सदस्य यांनी यशस्वी विद्यार्थ्यांचे अभिनंदन केले. विद्यार्थ्यांना मार्गदर्शन करणारे इयत्ता पाचवीचे वर्गशिक्षक लक्ष्मीकांत वाडिले आणि सहशिक्षक अमोल थिटे यांचाही या यशात मोलाचा वाटा आहे.
या प्रेरणादायी यशाबद्दल आम्हा सर्वांना त्यांचा अभिमान आहे. त्यांच्या या कामगिरीमुळे शाळेतील इतर विद्यार्थ्यांनाही भविष्यात असेच यश मिळवण्यासाठी नक्कीच प्रोत्साहन मिळेल, असे मुख्याध्यापक श्याम डोळस यांनी सांगितले.
