कोपरगाव प्रतिनिधी
कोपरगाव शहरालगत असलेल्या पशुसंवर्धन विभागाच्या मालकीच्या जागेवर काही महिन्यापूर्वी तत्कालीन उद्योगमंत्री ना.उदयजी सामंत यांनी एमआयडीसी उभारण्यासाठी हिरवा कंदील दिला आहे. त्यामुळे सदरची जागा तातडीने एमआयडीसीकडे त्वरित वर्ग करावी अशी मागणी आ.आशुतोष काळे यांनी विधिमंडळाच्या हिवाळी अधिवेशनात करून एमआयडीसी उभारण्यासाठी पुन्हा एकदा एक पाऊल पुढे टाकले आहे.
कोपरगाव मतदार संघातील विकासा बरोबरच सुशिक्षित बेरोजगार तरुणांच्या हाताला मतदार संघातच रोजगार उपलब्ध व्हावा यासाठी एमआयडीसी उभारण्यात पुढाकार घेवून एमआयडीसीला जागा मिळावी यासाठी पाठपुरावा करीत आहे. त्याबाबत तत्कालीन उद्योगमंत्री ना.उदयजी सामंत यांच्याशी सकारात्मक चर्चा झालेली असून त्यासाठी कोपरगाव शहरालगत असणारी पशुसंवर्धन विभागाच्या मालकीची जागा एमआयडीसीकडे वर्ग झाल्यास जागेचा प्रश्न मिटणार असून एमआयडीसी उभारण्याला वेग मिळणार आहे. त्यासाठी हि जागा लवकरात वर्ग करण्याबाबत आ.आशुतोष काळे यांनी मागणी केली. तसेच ना.उदयजी सामंत पुन्हा उद्योगमंत्री झाल्यास त्यांनी एमआयडीसी उभारण्यास चालना द्यावी अशी विनंती ना.उदयजी सामंत यांना केली.
तसेच मागील एक वर्षापासून १९१ कोटी निधीतून सुरु असलेल्या ७५२ जी सावळीविहीर-कोपरगाव रस्त्याचे काम अतिशय धीम्या गतीने सुरु आहे. त्यामुळे वाहनधारकांना व नियमित ये-जा करणाऱ्या प्रवाशांना अनेक अडचणींचा सामना करावा लागत आहे त्यासाठी हे काम लवकरात लवकर पूर्ण व्हावे. कोपरगाव मतदारसंघातील महत्वाचा राज्यमार्ग असलेल्या राज्य मार्ग ६५ वर बाराही महिने सातत्याने अवजड वाहतूक सुरु असते. या अवजड वाहतुकीचा भार वाहणाऱ्या राज्य मार्ग ६५ चे काम उच्च दर्जाचे होण्यासाठी या राज्यमार्गाचे राष्ट्रीय महामार्गात रुपांतर होवून या रस्त्याच्या कामासाठी एडीबी किंवा हॅम च्या माध्यमातून जास्तीत निधी मिळावा अशी मागणी देखील आ.आशुतोष काळे यांनी केली आहे.
