जेऊर कुंभारी वार्ताहर
कोपरगाव तालुक्यातील जेऊर कुंभारी गावामध्ये बिबट्याचे वारंवार दर्शन होत आहे. त्यामुळे नागरिकांत भितीचे वातावरण आहे. येथील गिरमेवस्ती परिसरात
गुरुवारी रात्री मयुर गिरमे यांनी बिबट्या पाहीला. या भागात मोठ्या प्रमाणात रहिवासी वस्त्या असल्याने वनविभागाने पिंजरा लावावा, अशी मागणी रहिवाशांकडून होत आहे.
जेऊर गावातील विविध भागांमध्ये बिबट्याचे सर्रास दर्शन होत आहे. अनेक ठिकाणी या बिबट्याने वस्तीवरील कुत्रे फस्त केलेली आहेत. पेरणीयोग्य पाऊस झाल्याने शेतकरी वर्ग मोठ्या प्रमाणात शेतीवर राबताना दिसत आहे. बिबट्या सरस हिंडताना दिसत आहेत. शाळा सुरू झाल्याने लहान लहान मुलांनाही शाळेत जावे लागते. त्यामुळे नागरिकांमध्ये प्रचंड दहशत आहे. काही दिवसापुर्वी गौतम बँकेचे संचालक बापुराव वक्ते यांचा बोकड बिबट्याने फस्त केला ही घटना ताजी असतानाच मोकाट
हिडंणाऱ्या बिबट्यामुळे नागरिकांमधील चिंता वाढली आहे. वन विभागाच्या अधिकाऱ्यांनी तातडीने या परिसरात पिंजरा लावून बिबट्याला जेरबंद करावे, अशी मागणी परिसरातील नागरिकांमध्ये होत आहे.
