कोपरगाव प्रतिनिधी
कोपरगाव तालुक्यातील अनुज सूर्यवंशीने आपला वाढदिवस सामाजिक भान जपत साजरा केला.
वयाची अठरा वर्ष पूर्ण झाल्यानंतर जसा मतदानाचा हक्क प्राप्त होतो तसा जबाबदार नागरीक म्हणूनही जबाबदारी निश्चित होते. बोरावके वस्ती,कोपरगाव येथे राहणारा अनुज सूर्यवंशी याने १ जानेवारी रोजी स्वतःचा वाढदिवस सामाजिक भान जपत साजरा केला.आई वडील दोघेही शिक्षक आहेत. शाळेतून आई वडील घरी आल्यानंतर अनुजला नवीन कपडे घे म्हणून आग्रह केला पण मला नवीन कपडे नको म्हणून स्पष्ट नकार दिला.त्याऐवजी वाढदिवस साजरा न करता साईबाबा काॕर्नर ला फूटपाथवर झोपणाऱ्या गरजू लोकांना ब्लँकेट, केळी वाटप करायचे आहे असे सांगितले.थंडीच्या दिवसात फूटपाथवर झोपताना कितीतरी अडचणी या लोकांना येत असतील असे त्याचे म्हणणे होते.काही दिवसापूर्वीच त्याची आई सुनिता सूर्यवंशी यांनी आपला वाढदिवस तालुक्यातील १५० शिक्षकांना प्रशिक्षणात पेन व पुस्तक देऊन साजरा केला होता.आई वडील सामाजिक भान जपत करत असलेले कार्य लहानपणापासून अनुजने पाहिले आहे.नकळत हा विचार त्याच्यात रुजला व हि कृती करावी असे वाटले.हेच खूप मोठे आहे.
कोपरगावमधील एका दुकानातून आई वडीलांनी अनुजला ब्लँकेट आणून दिले.त्याने ती ब्लँकेट साईबाबा काॕर्नर जवळील गरजू व्यक्तींना नेऊन दिले.केळी वाटप केले.त्यावेळी त्या व्यक्तींच्या चेहऱ्यावरील आनंद लाखमोलाचा होता.वयाची अठरा वर्ष ज्यादिवशी पूर्ण झाली त्याच दिवशी अनुजने केलेली हि कृती नक्कीच कौतुकास्पद आहे.आजची पिढी बेधुंद होऊन गुन्हेगारीकडे,चंगळवादाकडे वाहवत चालली आहे असे आपण म्हणतो.पण आजची तरुणाई ही सामाजिक भान जपत आहे हे ही नमूद करावसे वाटते.अनुजच्या या सामाजिक उपक्रमात नवनाथ सूर्यवंशी,सुनिता सूर्यवंशी,श्रेयस सूर्यवंशी,मानसी कदम,वैष्णवी कदम सहभागी झाले होते.
