कोपरगाव प्रतिनिधी
मराठा आरक्षणास विरोध करून मनोज जरांगे पाटील यांच्यावर टिका करणारे राज्याचे अन्न व नागरी पुरवठा मंत्री छगन भुजबळ यांचा सकल मराठा समाजाच्यावतीने प्रतिकात्मक प्रतिमेला जोडे मारत प्रतिमा जाळून शहरातील छत्रपती शिवाजी महाराज स्मारकासमोर निषेध करण्यात आला.
मंत्री भुजबळ यांनी यापुढे मनोज जरांगे पाटील यांच्यावर टीका करु नये. अन्यथा त्याचे परिणाम भोगावे लागतील, असा इशारा मराठा समाजाने दिला आहे. याप्रसंगी आंदोलकांनी मंत्री भुजबळ यांच्या विरोधात घोषणाबाजी केली. यावेळी अनिल गायकवाड, विनय भगत, अमित आढाव, अक्षय आग्रे, विजय जाधव, दीपक साळुंके, अशोक आव्हाटे, राजेंद्र वाकचौरे, बाळासाहेब जाधव आदींसह सकल मराठा समाज बांधव उपस्थित होते.अनिल गायकवाड म्हणाले, मराठा आरक्षणाचा प्रश्न पेटलेला असताना ओबीसी नेते मंत्री छगन भुजबळ यांनी मराठा समाजाला सरसकट कुणबी प्रमाणपत्र मिळालं आणि त्यातून आरक्षण मिळालं तर तो ओबीसींवर अन्याय असेल, असं म्हणत त्यांनी ओबीसी सभा घेतली व मनोज जरांगे पाटील यांच्यावर टीका केली. छगन भुजबळ यांची मंत्रिपदावरून हकालपट्टी करा, तसेच छगन भुजबळ हे राज्याचे सामाजिक स्वास्थ्य बिघडवण्याचे काम करत आहेत. सर्वसामान्य ओबीसी बांधवांचा कोणताही मराठा समाजास विरोध नसताना केवळ आपले राजकीय स्थान टिकवण्यासाठी दोन समाजात नसलेली भांडणं लावण्याचं पाप करत आहेत. छगन भुजबळ यांची मंत्री पदावरून हकालपट्टी करावी, अशी मागणी अनिल गायकवाड यांनी केली आहे.
