जेऊर कुंभारी वार्ताहर
पारंपरिक वेशभूषेतील बालचमुंची लगभग.. आकर्षक सजावट आणि “गणपती बाप्पा मोरया” चा नाद अशा उत्साही वातावरणात बुधवारी रेनबो इंटरनॅशनल स्कूल मध्ये गणेशोत्सव साजरा करण्यात आला.
शिक्षणमहर्षी लहानुभाऊ नागरे आण्णा स्थापित रेनबो इंटरनॅशनल स्कूल, जेऊर कुंभारी येथे दि.२७ सप्टेंबर रोजी गणेशोत्सवाचे आयोजन करण्यात आले. याप्रसंगी संस्थेचे सचिव मा. संजयजी नागरे, कार्यकारी संचालक मा. आकाशजी नागरे, संचालक मा. नानासाहेब दवंगे सर, उपप्राचार्य मा. निलेश औताडे सर, कार्यालयीन अधीक्षक मा. रवींद्र साबळे सर सर्व शिक्षक व शिक्षकेतर कर्मचारी व विद्यार्थी-विद्यार्थिनी उपस्थित होते.
सर्वप्रथम,व्यवस्थापन मान्यवर पदाधिकाऱ्यांचे स्वागत व परिचय इयत्ता दहावीची विद्यार्थिनी दिव्या शर्मा हिने केले. यानंतर अतिशय मंगलमय व प्रसन्न वातावरणात मान्यवरांच्या हस्ते श्री गणेश पूजन व गणरायाची आरती करण्यात आली.
गणेशोत्सवाचे महत्त्व विद्यार्थ्यांना समजावून सांगताना कलाशिक्षक दत्ता डोखे यांनी अथर्वशीर्ष पठणाने सुरुवात केली. ते म्हणाले, गणपती म्हणजे बुद्धी, समृद्धी सौभाग्याची देवता. सुखकर्ता – विघ्नहर्ता, १४ विद्या व ६४ कलांचा अधिपती आहे. महर्षी वेदव्यासांनी महाभारताची रचना करताना हे महाकाव्य लिहिण्याचे काम गणपती कडून करूवून घेतले होते.आपल्या अतिशय अभ्यासपूर्ण व रसाळ वाणीने त्यांनी भगवतगीता व ज्ञानेश्वरीचे दाखले देत विद्यार्थ्यांना मंत्रमुग्ध केले.
सांस्कृतिक कार्यक्रमात इयत्ता तिसरीची विद्यार्थिनी रियांशी वाळूंज हिने “पार्वतीच्या बाळा” हे सुंदर गीत गाऊन वातावरण भारावून टाकले. सध्याच्या गणपती उत्सवात सर्वत्र धुमाकूळ घालीत असलेले गीत “आमच्या पप्पांनी गंपती आणला ” व “बाप्पा मोरया” या गाण्यावर प्राथमिक वर्गातील विद्यार्थ्यांनी नेत्रदीपक असे सामूहिक नृत्य सादर केले. सातवीचा विद्यार्थी श्लोक उगले याने गणेश उत्सवावर उत्कृष्ट भाषण सादर केले.
यानंतर, उप प्राचार्य श्री निलेश औताडे सर यांनी आपले मनोगत व्यक्त करतांना गणेशोत्सव उपक्रमाचे स्वरूप व सामाजिक जाणीवा सांगितल्या. विद्यार्थ्यांशी दिलखुलास संवाद साधताना, त्यांनी विद्यार्थ्यांना मनमुराद हसवले. कार्यक्रमाच्या समारोपप्रसंगी संचालक मा. नानासाहेब दवंगे सर यांनी आपल्या मनोगतात सांगितले की, बालवयातच मुलावर चांगले संस्कार घडावेत यासाठी अशा उपक्रमांची आवश्यकता असते. त्यांनी कार्यक्रमाचे व विद्यार्थ्यांचे भरभरून कौतुक केले.
कार्यक्रमाचे यशस्वी आयोजन अमृता मानूरकर मॅडम व दत्ता डोखे सर यांनी केले होते.नृत्य मार्गदर्शन राहुल सर व प्रीती शेखो मॅडम यांनी केले. सूत्रसंचालन गार्गी दळवी व युग कुदळे या विद्यार्थ्यांनी सविता काळे मॅडम यांच्या मार्गदर्शनाखाली केले. तर आभार प्रदर्शन राणी भास्कर मॅडम यांनी केले.
विद्यार्थ्यांच्या कलागुणांना वाव देणाऱ्या या उपक्रमाचे, संस्थेचे अध्यक्ष मा. कांतीलालजी अग्रवाल, विश्वस्त मा. मनोजजी अग्रवाल, आनंदजी दगडे, व सौ. वनिताताई नागरे आदि पदाधिकाऱ्यांनी समाधान व्यक्त केले.
