कोपरगाव प्रतिनिधी
सुरूवातीच्या काळात आँनलाईन शॉपिंग शिपिंगला महत्त्व नसल्याने सर्व प्रकारची खरेदी स्थानिक व्यापाऱ्यांकडे होत असल्याने बाजारपेठेत चांगल्या प्रकारे आर्थिक उलाढाल होत होती परंतु गेल्या वर्षभरात आँनलाईन खरेदीचे प्रमाण शहरी भागासह ग्रामीण भागात देखील वाढल्याने कोपरगावची बाजारपेठेवर आँनलाईन शॉपिंगचा दुष्परिणाम दिसून येत आहे. कोपरगाव तालुक्यातील छोटा मोठा व्यापारी टिकवायचे असेल तर आँनलाईन शॉपिंग बंद करून स्थानिक व्यापाऱ्यांकडून वस्तू खरेदी करावे असे आवाहन कोपरगाव तालुका काँग्रेसचे तालुकाध्यक्ष आकाश नागरे यांनी कोपरगावकराना केले आहे.
व्यापारी किंवा दुकानदार कोणीही असो प्रत्येकाला वाटते आपल्या कडील माल चांगल्या कंपनीचा असल्याने खरेदी चांगल्या प्रकारे होईल परंतु तसे न होता आँनलाईनला शॉपिंगला महत्व दिले जात असल्याने कोपरगावातील अनेक व्यापाऱ्यांवर आर्थिक संकट आले आहे.
बाजारपेठेत कपडे, इलेक्ट्रिक साहित्य, मोबाईल असे अनेक प्रकारचे विक्री करणारे व्यापारी दुकाने थाटुन बसलेले असताना व्यापारी ग्राहकांच्या प्रतीक्षेत
दिवसभर बसलेला असतो. अशीच परिस्थिती गंभीर होत गेलीतर व्यापाऱ्यांसमोर मोठे संकट उभे राहायला वेळ लागणार नाही. गणेशोत्सव, महालक्ष्मी, घटस्थापना या सारखे सणासुदीचे दिवस सुरू झाले आहे. या कालावधीत मोठ्या प्रमाणात आँनलाईन खरेदीवर ऑफर दिले जात असल्याने नागरिकांनी स्थानिक दुकानदारांकडे पाठ फिरवली आहे. देशभरात कोरोनाचे संकट आले त्यावेळी आपल्याच छोटे मोठे व्यापाऱ्यांनी उधार उसनवार मदत एक विशेष सहकार्य केले आज याच व्यापाऱ्यांवर संकट आले असून सर्वांनी दुकानदारांना मदतीचा हात देऊन सामाजिक जबाबदारी पार पाडावी. तालुक्यातील सर्व नागरिकांनी वस्तू व साहित्यांची खरेदी ऑनलाइन शॉपिंग न करता स्थानिक बाजारपेठेतून खरेदी करावी असे आवाहन कोपरगाव तालुका काँग्रेसचे तालुकाध्यक्ष आकाश नागरे यांनी कोपरगावकराना केले आहे.
