कोपरगाव प्रतिनिधी
कोपरगाव शहरात साहित्यरत्न लोकशाहीर अण्णाभाऊ साठे यांचे
स्मारक उभारण्यात आले आहे. या ठिकाणी लोकशाहीर अण्णाभाऊ
साठे यांचा पुर्णाकृती पुतळा उभारून अनेक दिवस उलटले तरीही
शासनामार्फत अद्याप या पुतळ्याचे अनावरण करण्यात आलेले नाही.
तसेच शहरातील साहित्यरत्न लोकशाहीर अण्णाभाऊ साठे खुले
नाट्यगृहाच्या नूतनीकरणाचे काम गेल्या अनेक दिवसांपासून रखडले
आहे. प्रशासनाच्या हलगर्जीपणामुळे लोकशाहीर अण्णाभाऊ साठे यांच्या पूर्णाकृती पुतळ्याचे शासकीय अनावरण वेळेवर होत नाही. त्वरित अनावरण व्हावे यासाठी उपोषण करण्याची वेळ येती ही पुरोगामी महाराष्ट्रासाठी लाजिरवाणी बाब असून प्रलंबित प्रश्न मार्गी लावण्यासाठी शासन दरबारी काँग्रेसचे ज्येष्ठ नेते माजी महसूल मंत्री बाळासाहेब थोरात यांच्या मार्गदर्शनाखाली पाठपुरावा करणार असल्याचे आश्वासन कोपरगाव तालुका काँग्रेसचे तालुकाध्यक्ष आकाश नागरे यांनी दिले.
कोपरगाव शहरातील लोकशाहीर अण्णाभाऊ साठे यांच्या पूर्णाकृती पुतळ्याचे शासकीय अनावरण त्वरित करावे, लोकशाहीर अण्णाभाऊ साठे खुले नाट्यगृहाच्या नूतनीकरणाचे काम तातडीने चालू करावे, या मागण्यांसाठी सत्यशोधक लहुजी क्रांती सेनेचे उत्तर नगर जिल्हाध्यक्ष फकिरा चंदनशिव यांनी सुरू केलेल्या आमरण उपोषणास कोपरगाव तालुका काँग्रेसचे तालुकाध्यक्ष आकाश नागरे यांनी भेट घेऊन जाहीर पाठिंबा दिला. यावेळी कोपरगांव काँग्रेस कमिटीचे सरचिटणीस रवींद्र साबळे, अल्पसंख्यक काँग्रेसचे अध्यक्ष छोटुभाई पठाण, विष्णु पाडेकर, रफिकभाई शेख, यादवराव त्रिभुवन, रामनाथ गाडे, संतोष पवार, दीपक गोसावी, प्रमोद हिरे, काँग्रेस पक्षाचे कार्यकर्ते, लहुजी क्रांतिसेनेचे पदाधिकारी, विविध पत्रकार उपस्थित होते.
