कोपरगाव प्रतिनिधी
तालुक्यातील जेऊर कुंभारी शिवारातील समृद्धी टोलनाक्याजवळ उभ्या असलेल्या कंटेनरमधून डिझेलची चोरी करणार्या पाच चोरट्यांना अवघ्या २४ तासांत गजाआड करण्यात कोपरगाव शहर पोलिसांना यश आले आहे. पोलिसांच्या या कारवाईचे नागरिकांतून कौतुक होत आहे.
कोपरगाव शहर पोलिसांत बुधवारी (ता.२९) उत्तर प्रदेश राज्यातील रामकुमार शिवप्रसाद पटेल यांनी ११ हजार १६० रुपयांच्या १२० लिटर डिझेलची चोरी केल्याची फिर्याद दिलेली होती. त्यानुसार दाखल गुन्ह्याचा तपास करत असताना पोलीस निरीक्षक रामराव ढिकले यांना संशयित समृद्धी टोलनाक्याजवळ असल्याची खबर्याकडून माहिती मिळाली. त्यावरुन उपनिरीक्षक भरत दाते, पोहेकॉ. आर. पी. पुंड, के. ए. जाधव, पोकॉ. संभाजी शिंदे, महेश फड, जी. पी. थोरात, राम खारतोडे, गणेश काकडे यांना संशयितांना ताब्यात घेण्याच्या सूचना केल्या. त्यानंतर सदर ठिकाणी जावून त्यांना ताब्यात घेत विचारपूस केली सुरुवातीला उडवाउडवीची उत्तरे दिली. अखेर पोलिसी खाक्या दाखविताच त्यांनी गुन्हा केल्याची कबुली दिली.
सदर कंटेनरमधून चोरलेले डिझेल रमेश वायदंडे याच्या चारचाकी वाहनामधून रामपूरवाडी शिवारतील पत्र्याच्या हॉटेलमध्ये लपवून ठेवले असल्याचे सांगितले. त्यानुसार पोलिसांच्या पथकाने तेथून ९ हजार ७६५ रुपयांचे १०५ लिटरसह डिझेल काढण्याचे साहित्य जप्त केले. या कारवाईत पोलिसांनी रवीराज किशोर देसले, विक्की मच्छिंद्र गायकवाड, तान्हाजी किसन वायदंडे, अली इम्तियाज सय्यद यांना अटक केली आहे. तर रमेश तानाजी वायदंडे या फरार आरोपीचा पोलीस कसून शोध घेत आहे. या धडाकेबाज कारवाईचे नागरिकांतून कौतुक होत आहे.
