कोपरगाव नगरपालिका शाळा क्र.६ मधील इयत्ता तिसरी व सहावीच्या वर्गशिक्षिका सुनिता इंगळे यांनी वर्गात राष्ट्रीय विज्ञान दिन अभ्यासक्रमातील छोट- छोटे प्रयोग विद्यार्थ्यांकडून करुन घेत साजरा केला.प्रथमतः विद्यार्थ्यांना राष्ट्रीय विज्ञान दिन का साजरा केला जातो व त्याचे महत्व समजावून सांगितले. परीसरातील प्रत्येक घटकात विज्ञान आहे. अभ्यासक्रमातील बलाचे प्रकार-चुंबकिय बल,स्थितीज विद्युत बल,घर्षण बल,स्नायू बल,रेषीय बल,तरफ म्हणजे काय हे कृतीच्या माध्यमातून समजावून सांगितले. अभ्यासक्रमातील हे घटक प्रत्यक्ष कृती करताना विद्यार्थ्यांच्या चेहऱ्यावरील आनंद ओसांडून वाहत होता. चुंबकीय बल समजावून घेताना लाकडी भुश्यातून खिळे,चावी,टाचण्या,कात्री चुंबकाच्या साहाय्याने वेगळे कसे करु शकतो हे विद्यार्थ्यांनी प्रत्यक्ष कृती करुन पाहिले. चुंबकाचा वापर दैंनदिन जीवनात कोठे कोठे होतो ? असे विचारल्यावर विद्यार्थ्यांनी त्यांच्या परीचयातील अनेक उदाहरणे सांगितली. स्थितीज विद्युत बल समजावून घेताना कागदाचे छोटे छोटे तुकडे केल्यावर व पेन डोक्यावर घासून कागदांच्या कपट्याजवळ नेला असता कागदाचे कपटे पेनाला चिकटलेले पाहून मुलांना प्रथम नवलच वाटले.हे कसे काय होऊ शकते ? असे मुलांनी विचारल्यावर वर्गशिक्षिका सुनिता इंगळे यांनी स्थितीज विद्युत बल म्हणजे काय? ते कसे कार्य करते हे समजावून सांगितले.प्रदूषणाचा पर्यावरणाला त्रास कमी व्हावा म्हणून कचरा व्यवस्थापन कसे करावे हे ही सांगितले.घनकचरा,ओला कचरा वेगळा कसा ठेवावा हे उदाहरणासहित स्पष्ट केला.तसेच पर्यावरणात झाडांचे महत्त्व किती आहे.यासाठी ‘एक बी उद्यासाठी’ या उपक्रमाअंतर्गत मुलांनी खाल्लेल्या बिया तसेच परीसरातील झाडांच्या बिया संकलन करण्याचा उपक्रमही आजपासून वर्गात सुरु करण्यात आला.या जमा झालेल्या बिया पावसाळा सुरु होण्याअगोदर ओसाड माळरानावर,डोंगरांवर विद्यार्थी व शिक्षकांच्या साहाय्याने टाकल्या जाणार आहेत.अशा पद्धतीने विविध कृती घेत राष्ट्रीय विज्ञान दिन साजरा करण्यात आला.
वर्गात उपक्रम राबविण्यासाठी शाळेच्या मुख्याध्यापिका कल्पना निंबाळकर,शिक्षिका सविता साळुंके,आरती कोरडकर, शिक्षक अरुण पगारे यांचे नेहमीच उत्तम सहकार्य लाभत असते.
