कोपरगाव प्रतिनिधी
कोपरगाव येथे सोने खरेदीचा बहाना करून लाखो रुपयांचा ऐवज लुटणाऱ्या एका महिला आरोपीला कोपरगाव शहर पोलिसांनी नुकत्याच बेड्या ठोकल्या आहेत. चार चाकी वाहनांसह ४ लाख ६२ हजार ८६० रुपयांचा मुद्देमाल जप्त करण्यात आला असून शहर पोलिसांच्या या कारवाईचे सर्वत्र कौतुक होत आहे. कोपरगाव शहरातील सराफांच्या दुकानांमध्ये सोने खरेदीच्या बहाण्याने दोन महिला व पुरुष येऊन सराफ व्यवसायिकांना हात चला की नाही सोन्याचे दागिने चोरीचे सत्र सुरू होते. मागील वर्षापासून सराफांचे सोने चोरी बाबत गुन्हे उघडकीस येत नव्हते त्यामुळे सराफ बाजारात चिंतेचे सावट होते त्यामुळे हे गुन्हे उघड करण्याचे पोलिसांपुढे मोठे आव्हान निर्माण झाले होते.
सदर गुन्ह्याचे तपासात पोलीस निरीक्षक वासुदेव देसले यांचे मार्गदर्शनाखाली पोलीस उपनिरीक्षक भरत जाते यांनी तपास करून सदरचे गुन्हे उघडकीस आणले असल्याचे समजते.
सदर गुन्ह्यातील आरोपी जया सचिन बडगुजर रा.कात्रज भारतनगर पुणे हिला अटक करून गुन्ह्याचे अनुषंगाने विचारपूस करून तपास केला असता तिने गुन्ह्याची कबुली दिली आहे. या महिला आरोपीने तिचे साथीदारांसह कोपरगाव सराफ बाजारातून चोरलेले सोन्याचे दागिने, गुन्हा करताना वापरलेले वाहन, मोबाईल फोन असा गुन्ह्यात वापरला गेलेला माल तिच्याकडून पोलिसांनी हस्तगत केला आहे. तसेच सदर आरोपीने राहुरी पोलीस स्टेशन हद्दीत देखील अशाच प्रकारचे सोने चोरीचे गुन्हे केल्याचे निष्पन्न झाले आहे. आरोपीने चोरलेला ४ लाख ६२ हजार ८६० रुपयांचा मुद्देमाल जप्त करण्यात आला असून यात अजून तीन आरोपी असल्याचे निष्पन्न झाले असून त्यांचा शोध सुरू असल्याचे पोलीस निरीक्षक वासुदेव देसले यांनी सांगितले.
या कामगिरीमध्ये शिर्डी पोलीस उपविभागीय अधिकारी संजय सातव यांचे मार्गदर्शनाखाली पोलीस निरीक्षक वासुदेव देसले यांचे सह पोलीस उपनिरीक्षक भरत दाते, पोलीस कॉन्स्टेबल सुंबे, काकडे, दिवे, बनकर, दराडे, पो.ना.गोडसे, रहाणे अप्पर पोलीस अधीक्षक कार्यालय श्रीरामपूर सायबर सेलचे फुरकान शेख आदींनी भाग घेऊन यशस्वी केली.
