कोपरगाव प्रतिनिधी
कोपरगाव मतदारसंघात दुष्काळी परिस्थितीच्या पार्श्वभूमीवर ८ ऑक्टोबर रोजी मा. आ. स्नेहलताताई कोल्हे यांचा वाढदिवस विविध सामाजिक उपक्रम राबवून साधेपणाने साजरा करण्यात आला. वाढदिवसानिमित्त अनावश्यक खर्च टाळून गरजूंच्या मदतीसह समाजोपयोगी उपक्रमांना प्राधान्य देण्यात आले. यानिमित्त गरजू विद्यार्थिनींना पुस्तकांचे वाटप आणि धार्मिक स्थळाला भेट यासह गोशाळेस चारा वाटप असे उपक्रम राबविण्यात आले.
महाराष्ट्रासह कोपरगाव मतदारसंघात निर्माण झालेली दुष्काळी परिस्थिती आणि शेतकरी बांधवांच्या पिकांचे झालेले नुकसान लक्षात घेऊन त्यांनी वाढदिवस साधेपणाने साजरा करण्याचे आवाहन केले होते. वाढदिवसानिमित्त फलक, होर्डिंग्ज, बॅनर आणि पोस्टरवरील अनावश्यक खर्च टाळून गरजूंच्या मदतीसाठी तसेच समाजोपयोगी कार्यासाठी पुढाकार घ्यावा, अशी भूमिका त्यांनी मांडली होती.
मा.आ. स्नेहलताताई कोल्हे यांनी शिर्डी येथे सद्गुरू साईबाबा,सद्गुरू जनार्दन स्वामी महाराज आश्रम,आत्मा मालिक ध्यानपीठ येथे भेट देऊन महंत रमेशगिरीजी महाराज, आत्मा मालिक ज्ञानपीठाचे गुरुमाऊली दर्शन घेतले आणि आशीर्वाद घेतले. वाढदिवसाच्या निमित्ताने सामाजिक कार्यासोबतच आध्यात्मिक परंपरेचेही स्मरण करण्यात आले.कोपरगाव शहरातील भारतीय जनता पार्टीच्या जनसंपर्क कार्यालयात अनुलोम संस्थेच्या पुढाकारातून मानसकन्या अभियानांतर्गत गरजू विद्यार्थिनींना पुस्तकांचे वाटप करण्यात आले. विद्यार्थिनींना शिक्षणासाठी प्रोत्साहन मिळावे, त्यांच्या शैक्षणिक प्रगतीला हातभार लागावा आणि पुढील शैक्षणिक वाटचालीसाठी आवश्यक पाठबळ मिळावे, या उद्देशाने हा उपक्रम राबविण्यात आला.यासह दुष्काळाची झळ केवळ माणसांनाच नव्हे, तर पशुधनालाही बसत आहे. चाऱ्याची उपलब्धता कमी होत असताना मुक्या जीवांची काळजी घेणे हीदेखील सामाजिक जबाबदारी आहे. हीच भावना लक्षात घेऊन आमदार विवेकभैय्या कोल्हे यांच्या मार्गदर्शनाखाली संजीवनी युवा प्रतिष्ठानच्या युवा सेवकांनी या सेवाभावी उपक्रमात उत्स्फूर्त सहभाग घेतला. त्यांच्या माध्यमातून संत जनार्दन स्वामी आश्रमातील गोशाळेस चारा दान करण्यात आले. यावेळी आश्रमाचे मठाधिपती परमपूज्य महंत रमेशगिरीजी महाराज उपस्थित होते.
