कोपरगाव प्रतिनिधी
हॕरिसन ब्रँच शाळेत संविधान दिन बाबासाहेब आंबेडकर यांच्या प्रतिमेचे पूजन करून साजरा करण्यात आला. विद्यार्थ्यांचे सामूहीक व वैयक्तिक संविधानातील उद्देशिकेचे वाचन करुन घेण्यात आले.तसेच २६/११ च्या हल्ल्यातील शहीद पोलिसांना व जवानांना श्रद्धांजली वाहण्यात आली.
भारतीय संविधानाचे शिल्पकार डॉ.बाबासाहेब आंबेडकर यांच्या प्रतिमेचे पूजन शाळेचे मुख्याध्यापक नवनाथ सुर्यवंशी यांच्या हस्ते करण्यात आले.याप्रसंगी बालसभेचे आयोजन करण्यात आले होते. तसेच मुख्याध्यापक सुर्यवंशी यांनी विद्यार्थ्यांना संविधान दिन साजरा करण्याचा उद्देश व महत्व स्पष्ट करताना “आपल्या देशाच्या राज्यकारभारासाठी संविधान निर्माण करण्यात आले आहे. राज्यकारभार करताना लोकप्रतिनिधी संविधानातील नियमांचा आधार घेतात. त्यामुळे कोणावरही अन्याय होत नाही. संविधानात नागरिकांचे हक्क व कर्तव्येही सांगितली असल्याने नागरिकांनाही संविधानाचा उपयोग होतो.आपल्या देशाच्या राज्यकारभारासाठी लिखित संविधान तयार करण्यासाठी संविधान सभेची स्थापना करण्यात आली. डॉ. राजेंद्र प्रसाद हे या सभेचे अध्यक्ष होते. संविधानातील नियमांचा मसुदा तयार करण्यासाठी नेमण्यात आलेल्या मसुदा समितीचे अध्यक्ष डॉ. बाबासाहेब आंबेडकर हे होते. या मसुदा समितीने संविधानाला अंतिम रूप दिल्यावर २६ नोव्हेंबर १९४९ रोजी संविधान सभेने भारताचे संविधान स्वीकारले” याबाबत सविस्तर माहिती सांगितली.शाळेच्या शिक्षिका मनिषा शिंपी यांनी डॉ. बाबासाहेब आंबेडकर यांच्या जीवनचरित्राविषयी माहिती दिली. सदर प्रसंगी चांगदेव वक्ते सर व शाळा व्यवस्थापन समितीचे माजी अध्यक्ष शैलेश दळवी उपस्थित होते.
