कोपरगाव प्रतिनिधी
महाराष्ट्राच्या राजकीय आणि सामाजिक जीवनावर आपल्या कर्तृत्वाचा अजोड ठसा उमटविणारे दिवंगत उपमुख्यमंत्री स्व. अजितदादा पवार यांच्या प्रेरणादायी जीवनप्रवासाला उजाळा देणाऱ्या ‘आठवणीतले दादा’ या विशेष स्मरणपुस्तिकेचे प्रकाशन बुधवारी (दि. १४) मुंबईतील सह्याद्री अतिथीगृह येथे उपमुख्यमंत्री ना. सुनेत्राताई पवार यांच्या हस्ते संपन्न झाले. आमदार आशुतोष काळे यांच्या संकल्पनेतून साकारलेल्या या स्मरणपुस्तिकेतून अजितदादांचे नेतृत्व, त्यांचा संघर्षमय जीवनप्रवास, विकासाभिमुख विचार, धडाडीचे कार्य आणि कार्यकर्त्यांशी असलेले जिव्हाळ्याचे नाते यांचा भावपूर्ण शब्दांत वेध घेण्यात आला आहे.
स्व. अजितदादा पवार यांच्या सहवासातील आठवणी, त्यांच्या प्रशासकीय कारकिर्दीतील महत्त्वपूर्ण निर्णय, महाराष्ट्राच्या विकासासाठी त्यांनी दिलेले योगदान आणि सर्वसामान्य जनतेशी जोडलेली त्यांची नाळ यांचे प्रतिबिंब या स्मरणपुस्तिकेत उमटले आहे. दादांवर प्रेम करणाऱ्या राजकीय क्षेत्रातील मान्यवरांनी आपल्या आठवणी आणि अनुभवांतून त्यांच्या व्यक्तिमत्त्वाचे विविध पैलू उलगडले आहेत. दादांचे कणखर नेतृत्व, निर्णयक्षमता, विकासकामांबाबतची तळमळ आणि कार्यकर्त्यांवरील प्रेम यांचा हा आठवणींचा ठेवा नव्या पिढीलाही प्रेरणा देणारा ठरणार आहे. या पुस्तकाच्या संकल्पनेची मांडणी आमदार आशुतोष काळे यांनी केली असून, देवळाली प्रवरा येथील गणेश आंबीलवादे यांनी संपादनाची जबाबदारी पार पाडली आहे.
प्रकाशनप्रसंगी भावना व्यक्त करताना उपमुख्यमंत्री ना. सुनेत्राताई पवार म्हणाल्या की, आदरणीय दादांचा जीवनप्रवास, त्यांच्या सहवासातील आठवणी, प्रशासकीय कारकीर्द आणि महाराष्ट्रासाठी त्यांनी दिलेले योगदान या पुस्तकाच्या माध्यमातून शब्दबद्ध झाले आहे. दादांच्या कार्याचा आणि त्यांच्या व्यक्तिमत्त्वाचा प्रवास पुन्हा एकदा या पुस्तकाच्या माध्यमातून समोर आला आहे. आमदार आशुतोष काळे यांनी मांडलेली ही संकल्पना आणि गणेश आंबीलवादे यांनी केलेले संपादन यामुळे दादांच्या आठवणी जतन करण्याचा महत्त्वपूर्ण प्रयत्न झाला आहे. त्यांच्या आठवणी अशा स्वरूपात जपल्या जात आहेत, ही माझ्यासाठी अत्यंत भावनिक आणि जिव्हाळ्याची बाब आहे, अशी भावना त्यांनी व्यक्त केली.
यावेळी आमदार आशुतोष काळे यांनी स्व. अजितदादांशी असलेल्या आपल्या ऋणानुबंधांना उजाळा दिला. ते म्हणाले की, स्व.अजितदादांच्या खंबीर नेतृत्वाखाली काम करताना कोपरगाव मतदारसंघाच्या विकासाला गती देण्याची संधी मिळाली. दादांचा माझ्यावर मोठा विश्वास होता. त्यामुळे माझ्या राजकीय वाटचालीत ते केवळ मार्गदर्शक नव्हते, तर माझ्यासाठी भक्कम आधारस्तंभ होते. त्यांच्या पाठबळामुळे राजकारणात आत्मविश्वास आणि बळ मिळाले, तसेच जनतेच्या प्रश्नांसाठी प्रभावीपणे काम करण्याची प्रेरणा मिळाली.स्व.अजितदादांच्या निधनाने माझ्या राजकीय जीवनातील भक्कम आधारस्तंभ हरपला आहे. त्यांचे नेतृत्व, विकासाची दूरदृष्टी, निर्णयक्षमता आणि कार्यकर्त्यांवरील प्रेम सदैव स्मरणात राहील. त्यांच्या जाण्याने निर्माण झालेली पोकळी कधीही भरून निघणार नाही. त्यांच्या आठवणी आणि कार्याचा वारसा जतन करण्याच्या भावनेतूनच ‘आठवणीतले दादा’ या स्मरणपुस्तिकेची संकल्पना पुढे आली, असे आ. काळे यांनी सांगितले.
या प्रकाशन सोहळ्यास राज्याचे कृषिमंत्री ना. दत्तात्रय भरणे, अन्न व नागरी पुरवठामंत्री ना. छगन भुजबळ, वैद्यकीय शिक्षणमंत्री ना. हसन मुश्रीफ, महिला व बालविकासमंत्री आदिती तटकरे, अन्न व औषध प्रशासनमंत्री नरहरी झिरवाळ, आमदार दिलीप बनकर, श्रीकांत जाधव, सागर भालेराव, महेश गिरमे, स्मरणपुस्तिकेचे संपादक गणेश आंबीलवादे यांच्यासह पक्षातील ज्येष्ठ नेते, मान्यवर आणि प्रमुख पदाधिकारी उपस्थित होते.
