कोपरगाव प्रतिनिधी
कोपरगाव शहरातील बसस्थानक आणि शासकीय रुग्णालयातील प्रलंबित कामे, असुविधा आणि नागरिकांच्या तक्रारींची दखल घेत आ.विवेकभैय्या कोल्हे यांनी गुरुवार, दि. ८ ऑक्टोबर रोजी दोन्ही ठिकाणी प्रत्यक्ष भेट देऊन पाहणी केली.नागरिकांच्या समस्या सोडविण्यासाठी शर्थीने प्रयत्न करणार असल्याची ग्वाही आ. कोल्हे यांनी दिली.तसेच प्रलंबित कामे आणि सुविधांबाबत संबंधित अधिकाऱ्यांना तातडीने आवश्यक उपाययोजना करण्याच्या सूचना दिल्या.यावेळी संबंधित अधिकाऱ्यांकडून कामांची सद्यस्थिती जाणून घेत नागरिकांच्या अडचणी तातडीने दूर करण्याच्या सूचना त्यांनी दिल्या. बससेवेतील अनियमितता, विद्यार्थ्यांची गैरसोय, स्वच्छता आणि रुग्णालयाच्या बांधकामातील प्रलंबित बाबींवर त्यांनी लक्ष केंद्रित केले.
कोपरगाव ग्रामीण रुग्णालयाचे १०० खाटांच्या उपजिल्हा रुग्णालयात श्रेणीवर्धन करण्याचे काम सुरू आहे.या कामाची पाहणी करताना आ. विवेक कोल्हे यांनी बांधकामाची सद्यस्थिती, प्रलंबित कामे,रुग्णालय परिसरातील स्वच्छता, सुरक्षा व्यवस्था आणि बाह्य परिसरातील ड्रेनेज पाईपलाईनच्या कामाची माहिती घेतली. रुग्णालयाचे काम निर्धारित वेळेत आणि आवश्यक दर्जानुसार पूर्ण करून नागरिकांना आधुनिक आरोग्य सुविधा उपलब्ध करून द्याव्यात, अशा सूचना त्यांनी संबंधित अधिकाऱ्यांना दिल्या. या प्रकल्पासाठी आवश्यक सहकार्य मिळवून देण्याच्या दृष्टीने मुख्यमंत्री देवेंद्र फडणवीस यांच्याशी चर्चा करणार असल्याचेही त्यांनी सांगितले.बसस्थानकाच्या पाहणीदरम्यान स्वच्छता, परिसरातील ड्रेनेज पाईपलाईनचे काम आणि प्रवाशांसाठी उपलब्ध सोयी-सुविधांचा आढावा घेण्यात आला. काही दिवसांपूर्वी मा.आ. स्नेहलताताई कोल्हे यांनीही बसस्थानकाला भेट देऊन नागरिकांच्या तक्रारींची दखल घेत आवश्यक उपाययोजना करण्याच्या सूचना दिल्या होत्या. त्यानंतर सुरू झालेल्या कामांची पाहणी करत आमदार विवेक कोल्हे यांनी अद्याप प्रलंबित असलेल्या प्रश्नांची माहिती घेतली.
यावेळी विद्यार्थी, प्रवासी आणि स्थानिक नागरिकांशी संवाद साधताना बस वेळेवर उपलब्ध न होणे, काही ठिकाणी बस न थांबणे तसेच बस पुढे निघून गेल्यामुळे विद्यार्थ्यांना महाविद्यालयात आणि प्रात्यक्षिकांसाठी वेळेत पोहोचताना होणारा त्रास अशा समस्या समोर आल्या. बसस्थानकाकडे उपलब्ध असलेल्या बस, आवश्यक अतिरिक्त बसफेऱ्या, ग्रामीण भागातील बससेवा तसेच चालक-वाहकांच्या उपलब्ध मनुष्यबळाबाबत एसटी महामंडळाच्या अधिकाऱ्यांकडून सविस्तर माहिती घेण्यात आली.
प्रवासी आणि विद्यार्थ्यांची गैरसोय दूर करण्यासाठी आवश्यक उपाययोजना करण्याच्या सूचना यावेळी देण्यात आल्या.आरोग्य आणि सार्वजनिक वाहतूक या नागरिकांच्या दैनंदिन जीवनाशी संबंधित महत्त्वाच्या प्रश्नांवर प्रत्यक्ष पाहणी करत आमदार विवेकभैय्या कोल्हे यांनी प्रलंबित कामांचा आढावा घेतला. संबंधित कामे वेळेत पूर्ण करून नागरिकांना आवश्यक सुविधा उपलब्ध करून देण्यासाठी सातत्याने पाठपुरावा केला जाणार असल्याचे यावेळी स्पष्ट करण्यात आले.या पाहणीवेळी संबंधित अधिकारी, कर्मचारी, स्थानिक पदाधिकारी, कार्यकर्ते, विद्यार्थी आणि नागरिक उपस्थित होते.
