जेऊर कुंभारी वार्ताहर
पंतप्रधान नरेंद्र मोदी यांनी सलग सर्वाधिक काळ देशाची सेवा करणारे पंतप्रधान म्हणून ऐतिहासिक विक्रम प्रस्थापित केल्याच्या पार्श्वभूमीवर भारतीय जनता पार्टी महाराष्ट्र प्रदेशाध्यक्ष रविंद्र चव्हाण यांच्या आवाहनाला प्रतिसाद देत जेऊर कुंभारी येथील श्री मारुती मंदिरात भाजप कार्यकर्त्यांच्या वतीने सामूहिक पूजा व महाआरतीचे आयोजन करण्यात आले. धार्मिक वातावरणात पार पडलेल्या या कार्यक्रमातून देशाच्या प्रगतीसाठी तसेच पंतप्रधान नरेंद्र मोदी यांच्या दीर्घायुष्य, उत्तम आरोग्य व उज्ज्वल भविष्यासाठी प्रार्थना करण्यात आली.
यावेळी महर्षी शंकरराव कोल्हे सहकारी साखर कारखान्याचे संचालक बाळासाहेब वक्ते, संचालक सतीश आव्हाड, माजी सभापती शिवाजी वक्ते, आरपीआय (आठवले) प्रदेश सचिव दिपकराव गायकवाड, विजय रोहम, माजी संचालक मधुकर वक्ते, उपसरपंच जालिंदर चव्हाण, कोंडीराम वक्ते, अशोक राऊत, रमेश वक्ते, संजय शांतीलाल वक्ते यांच्यासह भाजपचे पदाधिकारी, कार्यकर्ते व ग्रामस्थ मोठ्या संख्येने उपस्थित होते.
यावेळी उपस्थितांना संबोधित करताना महर्षी शंकरराव कोल्हे कारखान्याचे संचालक बाळासाहेब वक्ते म्हणाले की, “पंतप्रधान नरेंद्र मोदी यांच्या नेतृत्वाखाली भारताने जागतिक स्तरावर नवे स्थान निर्माण केले आहे. देशाच्या सर्वांगीण विकासासाठी त्यांनी केलेले कार्य प्रेरणादायी असून, त्यांच्या निरोगी आणि दीर्घायुष्यासाठी ही सामूहिक प्रार्थना करण्यात आली आहे. देश अधिक सक्षम, समृद्ध आणि आत्मनिर्भर व्हावा, हीच सर्वांची भावना आहे.”
भक्तिमय वातावरणात पार पडलेल्या या कार्यक्रमात उपस्थितांनी राष्ट्रहित, सामाजिक एकात्मता आणि विकासाचा संदेश देत देशाच्या उज्ज्वल भविष्यासाठी प्रार्थना केली.
