जेऊर कुंभारी वार्ताहर
गेल्या अनेक दिवसांपासून दहशत माजवणारा बिबट्या अखेर वनविभागाच्या पिंजऱ्यात जेरबंद करण्यात आला आहे. या घटनेमुळे जेऊर कुंभारी परिसरातील नागरिकांनी मोठा दिलासा मिळाल्याची भावना व्यक्त केली आहे.
मागील काही दिवसांपासून बिबट्याचा वावर वाढल्याने शेतकरी व ग्रामस्थांमध्ये भीतीचे वातावरण निर्माण झाले होते. बिबट्याने गाय, शेळ्यांवर हल्ले करून त्यांना फस्त केल्याच्या घटना घडल्यामुळे नागरिकांमध्ये चिंतेचे वातावरण होते. विशेषतः शाळेत जाणाऱ्या लहान मुलांच्या सुरक्षेचा प्रश्न निर्माण झाला होता.
ग्रामस्थांच्या सततच्या मागणीनंतर वनविभागाने तातडीने कारवाई करत किशोर मनोहर वक्ते यांच्या सर्वे नंबर ४|१ या मक्याच्या शेतात पिंजरा लावला. अखेर शनिवारी दुपारी सुमारे ४ वाजता साधारण तीन वर्षांचा बिबट्या पिंजऱ्यात अडकला.
ही मोहीम वनविभाग अधिकारी एम. वाय. शेख व बी. एच. जाधव यांच्या मार्गदर्शनाखाली यशस्वीरीत्या पार पडली. उपसरपंच जालिंदर चव्हाण ग्रामपंचायत सदस्य किशोर वक्ते,
महेंद्र वक्ते, मनोहर वक्ते, संतोष वक्ते, पांडुरंग वक्ते यांनीही या कारवाईत मोलाचे सहकार्य केले.
बिबट्या जेरबंद झाल्यानंतर गावकऱ्यांनी सुटकेचा निश्वास सोडला असून, वनविभागाने नागरिकांना सतर्क राहण्याचे आवाहन केले आहे.
