जेऊर कुंभारी वार्ताहर
जिल्हा परिषद प्राथमिक शाळा गिरमे वस्ती येथे क्रांतीज्योती माता सावित्रीबाई फुले यांची जयंती साजरी करण्यात आली. यावेळी शाळेच्या मुख्याध्यापिका सौ पर्वत मॅडम यांनी माता सावित्रीबाई फुले यांच्या प्रतिमेस पुष्पहार अर्पण करून अभिवादन केले . विद्यार्थ्यांना मार्गदर्शन करताना त्या म्हणाल्या की माता सावित्रीबाई फुले या थोर समाज सुधारक असून स्त्री शिक्षणाच्या प्रणेत्या होत्या. त्यांनी शिक्षणाची मशाल हाती घेऊन समाजाला नवीन दिशा दिली. श्री धूमणे सर यांनी विद्यार्थ्यांना माता सावित्रीबाई फुले यांचा जीवनप्रवास सांगून त्यांच्या जीवन प्रवासातून प्रेरणा घेऊन आपण महिला सक्षमीकरण आणि समाज सुधारण्यासाठी जागरूक आणि कटिबद्ध असले पाहिजे असे सांगितले. तर ग्रामपंचायत सदस्य प्रदीप गायकवाड यांनी माता सावित्रीबाई फुले यांना अभिवादन करून विद्यार्थ्यांना मार्गदर्शन करताना सांगितले की, माता सावित्रीबाई फुले यांनी त्याकाळी मुलींसाठी पहिली शाळा उघडली. त्यांनी स्त्री शिक्षणावर विशेष भर दिला. समाजाचा विरोध आणि अनेक अडचणींवर मात करत त्यांनी हे महान कार्य केले. डॉक्टर बाबासाहेबांनी संविधानातून स्त्रियांना विशेष अधिकार दिले तर माता सावित्रीबाई फुले यांनी स्त्री शिक्षणासाठी प्रत्यक्ष पुढाकार घेतला. त्यामुळेच आजच्या आधुनिक युगात आपल्या भारत देशामध्ये एक महिला राष्ट्रपती व पंतप्रधान होऊ शकते. यावेळी ग्रामस्थ भास्कर चव्हाण शंकर वक्ते, अंगणवाडी सेविका श्रीमती होन, वक्ते मावशी विद्यार्थी उपस्थित होते. तर काही विद्यार्थिनींनी माता सावित्रीबाईंची वेशभूषा करून भाषण केले.
