जेऊर कुंभारी वार्ताहर
जेऊर कुंभारी गावातील शिंदे वस्ती येथे १९ जुलै रोजी खरीप हंगाम अंतर्गत सोयाबीन पीक उत्पादन तंत्रज्ञान
या विषयावरील शेती शाळा वर्ग भरविण्यात आला. त्यासाठी मनोज सोनवणे तालुका कृषी अधिकारी कोपरगाव हे प्रमुख मार्गदर्शक म्हणून उपस्थित होते.
शेतीशाळा वर्गास जेऊर कुंभारी परिसरातील शेतकऱ्याचा उत्स्फूर्त प्रतिसाद मिळाला. मनोज सोनवणे यांनी या शेती शाळेत सोयाबीन पिकाच्या पूर्व तयारीपासून ते काढणीपर्यंत टप्याटप्याने माहिती देण्यात आली. सोयाबीन पीक बियाणे निवड, बियाणे खरेदी करताना घ्यावयाची काळजी, जैविक बीजप्रक्रिया करून पेरणी, बीबीएफ यंत्राने पेरणी याबाबत सविस्तर मार्गदर्शन करण्यात आले.
खरीप हंगामातील सोयाबीन हे एक महत्त्वाचे व चांगले उत्पन्न देणारे पीक आहे. या पिकास कृषी तंत्रज्ञानाची जोड देणे, शेतकऱ्यांना पीक अवस्थेनुसार पिकाची माहिती मिळावी, शेतकऱ्यांच्या उत्पादन आणि उत्पन्नात वाढ व्हावी यासाठी कृषी विभागाकडून शेती शाळा घेण्यात आली.
यावेळी तज्ञ प्रशिक्षक निर्मला सोनवणे कृषी अधिकारी कोकामठाण यांनी या शेती शाळेत शाश्वत मृदा संवर्धन, जैविक खत बीज प्रक्रिया, हिरवळीच्या खतांचा वापर, निरोगी खात्रीशिर बियाणे, एकात्मीक खत व्यवस्थापन, पायखाताचा वापर या गोष्टी शेतकरी पीक उत्पादनांत दुर्लक्षित करतो त्यामुळे त्याचे उत्पादन आणखी कमी होते. सध्या सोयाबीन पीकांवर किड मोठ्या प्रमाणात वाढू लागला आहे, तेव्हा जैविक कीटकनाशके, जैविक बुरशीनाशकांचा वापर वाढवला पाहिजे.तसेच या वेळी या वेळी सी. आर ए टेक्निक पद्धतीने
फळबाग लागवड हे प्रात्यक्षिक घेण्यात आले.
जेऊर कुंभारी गावासाठी नव्याने दाखल झालेले कृषी अधिकारी बाजिराव वाघमोडे यांचा सत्कार गोदावरी खोरे केन ट्रान्सपोर्टचे संचालक दिलीपराव शिंदे यांनी केला.
दिलीप शिंदे यांनी सांगितले की अशा पद्धतीचा कृषी जागर शेती क्षेत्रावर झाल्यास त्यातून शेतकऱ्यांचे पीक उत्पादन वाढ शाश्वतपणे होऊन त्यांच्या शंकाचे निरसन होईल, शेतकऱ्यांनी अशा कार्यक्रमांची जनजागृती वाढवावी असेही ते म्हणाले.
या कार्यक्रमासाठी सुनील घारकर मंडळ कृषी अधिकारी पोहेगाव, संजय घनकुटे कृषी पर्यवेक्षक यांचे मार्गदर्शन लाभले. जेऊर कुंभारी येथील प्रगतशील शेतकरी मोठ्या संख्येने उपस्थित होते.
