कोपरगाव प्रतिनिधी
आई आणि शाळेच्या संस्काराची शिकवण सर्वात मौल्यवान असल्याचे प्रतिपादन भारताचे माजी हवाईदल प्रमुख अनिल यशवंत टिपणीस यांनी केले. नाशिक देवळाली कॅम्प येथील बान्स हायस्कुलच्या माजी विद्यार्थ्यांचा स्नेह मेळावा नुकताच संपन्न झाला त्याप्रसंगी ते हजारो आजी माजी विद्यार्थ्यांसमोर प्रमुख पाहुणे म्हणून बोलत होते. माजी हवाईदल प्रमुख अनिल टिपणीस यांनी देखील याच शाळेतुन शैक्षणिक गुणवत्तेचा पाया रचला. या हायस्कुलचे कोपरगांव तालुक्यातील मुर्शतपुरचे माजी विद्यार्थी व सहकारमहर्षी शंकरराव कोल्हे सहकारी साखर कारखान्याचे परचेस ऑफिसर भाउसाहेब दवंगे, कोळपेवाडी येथील माजी विद्यार्थी उत्तमराव कु-हाडे, भाउसाहेब कोळपे यांनाही माजी हवाईदल लष्कर प्रमुख अनिल टिपणीस यांच्यासोबत वार्तालाप करण्यांची संधी मिळाली. या सर्व आजी माजी विद्यार्थ्यांनी शाळेतील जुन्या आठवणींना उजाळा दिला. हायस्कुलच्या मुख्याध्यापिका उत्तरा कुलकर्णी म्हणाल्या की, भारत देशाच्या हवाई दल प्रमुख सर्वोच्च पदावर बान्स हायस्कुलमधुन शिक्षण घेवुन बाहेर पडलेल्या अनिल टिपणीस यांना कामाची संधी मिळाली होती हे आमचे परमभाग्य असुन येथील शैक्षणिक गुणवत्तेचा दर्जा सातत्याने टिकवुन ठेवण्यांत सर्वच शिक्षक शिक्षकेतर कर्मचारी सातत्यांने प्रयत्न करतात असे त्या म्हणाल्या.
माजी हवाईदल प्रमुख अनिल टिपणीस यांनी भारतीय लष्कर व अन्य प्रशासकीय सेवेतील संधी याबाबत विद्यार्थ्यांना मार्गदर्शन करून कारगील युध्दप्रसंगाच्या आठवणी सांगितल्या.
याप्रसंगी माजी विद्यार्थी श्री. कौल यांच्यासह विविध क्षेत्रातील नामांकित मान्यवर, प्रतिष्ठीत आजी माजी विद्यार्थी मोठ्या संख्येने उपस्थित होते. भारतीय हवाई दलाचे माजी लष्कर प्रमुख अनिल टिपणीस यांच्याशी कोपरगांव येथील रहिवासी व बान्स हायस्कुल नाशिकचे माजी विद्यार्थी भाउसाहेब दवंगे, उत्तमराव कु-हाडे, भाउसाहेब कोळपे यांनी वार्तालाप साधला.
