जेऊर कुंभारी वार्ताहर
स्टेट इनोवेशन अँड रिसर्च फाउंडेशन महाराष्ट्र (सर फाउंडेशन) राष्ट्रीय स्तरीय शैक्षणिक उपक्रम स्पर्धा 2023 चा निकाल नुकताच जाहीर झाला आहे. या स्पर्धेत नगरपालिका शाळा क्रमांक ६ कोपरगाव येथील उपक्रमशील शिक्षिका सुनिता इंगळे यांनी सादर केलेल्या ‘उतारा वाचन एक पूरक उपक्रम’ या नवोपक्रमाची निवड राष्ट्रीय स्तरावर करण्यात आली आहे. महाराष्ट्रातील अनेक जिल्ह्यातील शिक्षकांचा यात समावेश आहे.सर फाउंडेशन महाराष्ट्र राज्य समन्वयक बाळासाहेब वाघ, हेमा वाघ, सिद्धाराम माशाळे, जिल्हा समन्वयक विनय राणी, आयटी प्रमुख राजकिरण चव्हाण यांनी ही माहिती दिली पुरस्काराचे वितरण मे महिन्यामध्ये ‘विशेष एज्युकेशनल इनोव्हेशन कॉन्फरन्स’ मध्ये होणार आहे. यावेळी शिक्षण क्षेत्रातील अनेक मान्यवर उपस्थित राहणार आहेत. यात शिक्षण तज्ञांची व्याख्याने, उपक्रमाची सादरीकरण, परिसंवाद, कार्यशाळा, गटचर्चा असे विविध कार्यक्रम होणार आहे
सुनिता इंगळे यांनी राबवलेला उपक्रम हा कोरोना कालावधी पासून संपूर्ण महाराष्ट्रात चालू आहे.या उपक्रमाचा फायदा शाळेतील विद्यार्थ्यांबरोबर महाराष्ट्रातील विद्यार्थ्यांनाही होत आहे. विद्यार्थ्यांना छोट छोटे उतारे देऊन त्यावर जास्तीत जास्त प्रश्नांची निर्मिती केली आहे.त्यांच्या या उपक्रमाचे पुस्तक तयार झाले असून सध्या संपूर्ण महाराष्ट्रात या पुस्तकास प्रचंड मागणी आहे. या पुस्तकाचा विद्यार्थ्यांना चांगला उपयोग होत आहे.सेवानिवृत्त अधिकारी,मुख्याध्यापक व शिक्षकही या पुस्तकास आपल्या वाढदिवसानिमित्त,सेवानिवृत्ती प्रसंगी विद्यार्थ्याना व शाळांना भेट म्हणून देण्यास पसंती दर्शवत आहेत.
सुनिता इंगळे यांच्या यशाबद्दल नगरपालिका शिक्षण मंडळाचे प्रशासन अधिकारी श्रीराम थोरात, नगरपालिका शिक्षण मंडळातील मुख्याध्यापक, शिक्षक, शाळेच्या मुख्याध्यापिका सविता साळुंके,कल्पना निंबाळकर, आरती कोरडकर,अरुण पगारे, शालेय व्यवस्थापन समितीचे अध्यक्ष अर्चना वाघुळकर, पालक व विद्यार्थी आदींनी अभिनंदन केले आहे.
