कोपरगाव प्रतिनिधी
कोपरगाव तालुक्यातील जिल्हा परिषद प्राथमिक शाळा नगदवाडी येथे लेखक आपल्या प्रत्यक्ष भेटीला या कार्यक्रमांतर्गत संवाद ११ मोठ्या उत्साहात साजरा झाला.इयत्ता चौथीच्या मराठी विषयात अंजली ताई अत्रे यांचा मीठाचा शोध हा पाठ आहे. पाठा द्वारे अंजली ताई मुलांना परिचित होत्याच परंतु त्यांची प्रत्यक्ष भेट व त्यांच्याशी सुसंवाद हा अनुभव मुलांसाठी खूपच आनंददायी होता. ताईंनी मुलांना केलेले अनमोल मार्गदर्शन तसेच विद्यार्थ्यांनी विचारलेल्या प्रश्नांचे ताईंनी केलेले समाधान मुलांच्या ज्ञानात व अनुभवात निश्चितच महत्त्वपूर्ण भर टाकणारे ठरले.ताईंनाही मुलांना भेटून व त्यांच्याशी सुसंवाद साधून खूप छान वाटले. शाळा व मुलांचे त्यांनी भरभरून कौतुक केले. जिल्हा परिषद शाळेतील विद्यार्थी उद्याचे उज्वल भविष्य असल्याचे त्यांनी म्हटले. ताईंच्या प्रत्यक्ष भेटीने मुले अक्षरशः भारावून गेले.या कार्यक्रमाची संधी शाळेला श्री अशोक शिरसाट सर व ज्ञानेश्वर सैंदाणे सर यांचेमुळे प्राप्त झाली. कार्यक्रमाला शाळेतील मुख्याध्यापक श्री प्रभाकर गायकवाड आशिष साबळे श्रीमती वृषाली शेळके तसेच केंद्रप्रमुख श्रीमती भारती शेळके विस्तार अधिकारी श्रीमती इंदुमती धट व माननीय गटशिक्षणाधिकारी शबाना शेख यांचे सहकार्य लाभले. तसेच शाळा व्यवस्थापन समिती नगदवाडी व पालक यांचेही मोलाचे सहकार्य मिळाले.
